Kenemglev ar metr

Kenemglev ar metr zo ur skrid-emglev etrebroadel skrivet e galleg (Convention du Mètre) ha sinet d'an 20 a viz Mae 1875 gant 17 riez hag en deus da bal unaniñ ar pouezioù hag ar muzulioù war an dachenn etrebroadel. Adrenket e voe e 1921 gant ar 6vet CGPM. E 1960 e voe adanvet ar sistem unanennoù bet diazezet gantañ Système international d'unités (SI) ("Sistem unanennoù etrebroadel").

Tri aozadur a zo bet krouet gant ar C'henemglev :

• BIPM (Burev Etrebroadel ar Pouezioù hag ar Muzulioù ; Bureau international des poids et mesures) - ur greizenn etrebroadel diwar-benn ar vetrologiezh e Sèvres e-kichen Pariz ;
• CGPM (Kendalc'h Meur ar Pouezioù hag ar Muzulioù; Conférence générale des poids et mesures) - ur vodadeg dalc'het bep pevar pe c'hwec'h vloaz gant dilennidi eus an holl vroioù ezel ;
• CIPM (Kuzuliadeg Etrebroadel ar Pouezioù hag ar Muzulioù ; Comité international des poids et mesures) - ur guzuliadeg velestradurel en em vod bep bloaz er BIPM.

En o c'hichen ez eus dek "kuzuliadeg aliañ" ("CC"), da skouer : "Comité consultatif d'électricité et magnétisme (CCEM)".